ვის მიერ დამზადებულ სახის კრემებს ხმარობს სალიტა ჩუბინიძე?

"რუსთავი 2"-ის გასართობი გადაცემა "ჩვენი შოუ" ლამაზი გოგონებით განებივრებულია. სალიტა ჩუბინიძე სწორედ ამ შოუს მსახიობი გახლავთ, რომელიც თავის მოვლას იმხელა ყურადღებას
უთმობს, რომ სახლშიც კი მაკიაჟით დადის.

- სალიტა, საახალწლო სამოსს განსაკუთრებულად არჩევ? ასტროლოგების რჩევებს თუ ითვალისწინებ?

- მეტ-ნაკლებად ვითვალისწინებ, მაგრამ ჯერ კიდევ არ მაქვს მოფიქრებული ახალი წლის ღამეს რას ჩავიცვამ.

- ახლა შავი, წითელი, მწვანეა აქტუალური, გიყვარს ეს ფერები?

- მწვანე მიყვარს, ასევე თეთრიც, დანარჩენები მეტ-ნაკლებად.

- თავის მოსაწესრიგებლად რა დრო გჭირდება?

- დაახლოებით ნახევარი საათი, ამ დროში ვასწრებ მსუბუქი მაკიაჟის გაკეთებას, ჩაცმას და გასვლას.

- შენი აზრით, ქალი მაკიაჟს ყოველდღიურად უნდა იკეთებდეს?

- ქალი ყოველთვის ფორმაში უნდა იყოს, მაგრამ მაკიაჟის გაკეთება ცოტა ინდივიდუალურია. შეიძლება ადამიანი უმაკიაჟოდაც ლამაზი იყოს და არ წაისვას არაფერი, მაგრამ თუ მიგაჩნია, რომ მაკიაჟი შენს გარეგნობას უფრო ეფექტურს ხდის, მაშინ რატომაც არ უნდა შეიღებო ყოველდღიურად?!

- სახლშიც იღებები და იპრანჭები?

- კი, მიყვარს, როცა კარგად გამოვიყურები და ფორმაში ვარ, არ აქვს მნიშვნელობა, სახლში ვიქნები თუ გარეთ. მსუბუქად - თვალის ფანქრითა და ჩრდილებით შინ ყოფნისასაც ვიღებები.

- როგორი კანი გაქვს? კოსმეტოლოგთან სტუმრობა გიწევს?

- კარგი კანი მაქვს და არასდროს მქონია ამ მხრივ პრობლემა, მაგრამ მას შემდეგ, რაც ტელევიზიაში დავიწყე მუშაობა და ყოველკვირა მიწევს მძიმე მაკიაჟის გაკეთება, რომელიც საშინლად ვნებს კანს, გადავწყვიტე ვესტუმრო კოსმეტოლოგს, ჯერჯერობით არ მივსულვარ, მაგრამ ეს საკითხი დღის წესრიგში დგას.

ისე, ბებიაჩემი ბალახეულობით მკურნალობს და საჭიროების შემთხვევაში ჩემი კანისთვის შესაფერის საშუალებებს მიმზადებს. ნაყიდ კრემებს ეს ნამდვილად მირჩევნია (იღიმება).

- ვთქვათ, მოხვდი ისეთ ადგილას, სადაც არც სალონია და შესაბამისად არც სტილისტი, შეგიძლია ვარცხნილობის პრობლემა თავად მოაგვარო?

- კი, ეს ჩემთვის პრობლემას არ წარმოადგენს, ძალიან დამყოლი თმა მაქვს და ადვილად ვიკეთებ ისე, როგორც იმ მომენტში მინდა.

- სალიტა, რა გაცვია ყოველდღიურად?

- უფრო სპორტული სტილის მომხმარებელი ვარ. ჩემი ყოველდღიური სამოსი კედები, შარვალი და სპორტული მაისურია. კაბებს ნაკლებად ვიცვამ, არ არის ეს სამოსი ჩემთვის კომფორტული.

- "ჩვენს შოუში" ყოველთვის მაღალქუსლიანი ფეხსაცმელი გაცვია, ყოველდღიურობაში არ იყენებ მაღლებს?

- მიუხედავად იმისა, რომ არანაირად არ მიჭირს მაღლებზე სიარული, ყოველდღიურობაში ნაკლებად ვიცვამ ამ ტიპის ფეხსაცმელს, კედები მაინც ყველაფერს მირჩევნია.

- გიყვარს ხშირად ერთი და იმავე სამოსის მორგება?

- საკმაოდ მრავალფეროვანი გარდერობი მაქვს, მაგრამ სამოსის ამოჩემება ვიცი და სანამ არ მეტყვიან გაიხადე, სირცხვილია, სულ ერთი და იგივე რომ გაცვიაო, მანამდე არ ვიხდი (იღიმება).

- ვის აზრს აქვს გადამწყვეტი მნიშვნელობა შენთვის სამოსის შერჩევისას?

- ამ საკითხში დედაჩემისა და ძალიან ახლო მეგობრების აზრს ვითვალისწინებ.

- სამოსს წინა დღით არჩევ თუ გასვლის წინ წყვეტ რა ჩაიცვა?

- გააჩნია სიტუაციას, ხან წინა დღით ვარჩევ, ხან კი გასვლისას ვწყვეტ რა ჩავიცვა.

- მოწესრიგებული ხარ, თუ შეგიძლია გარდერობი არეული დატოვო?

- როცა მეჩქარება, არეულსაც ვტოვებ, მაგრამ ძირითადად მაინც დალაგებული მაქვს.

- სამოსის თხოვება-გათხოვება თუ გჩვევია?

- კი და არანაირი პრობლემა არ მაქვს ამ საკითხთან დაკავშირებით, პირიქით, მიხარია, თუ ვინმეს ჩემი სამოსი გამოადგება და მოირგებს. მეც მქონია შემთხვევა, როცა მეგობრისგან მითხოვია სამოსი, ერთხელ სადღაც მივდიოდი და არ მომწონდა ის, რაც მე მქონდა, ამიტომ დაქალთან წავედი და იქ გამოვეწყვე.

- სალიტა, როგორც ყველას, ალბათ შოპინგი შენც გიყვარს.

- კი, მაგრამ ბოლო დროს აღარ მსიამოვნებს, რადგან ბევრს ვყოყმანობ ვიყიდო თუ არა შერჩეული ნივთი, იმდენს ვფიქრობ, რომ ვიღლები და სასიამოვნო სულაც აღარაა ეს პროცესი. თუ ვინმე არ წავიყვანე და არ მითხრა, რომ ეს ნივთი კარგია და მიხდება, ვერა და ვერ მივდივარ შეძენის გადაწყვეტილებამდე.

- საკუთარი თავისთვის ფულის დახარჯვა გენანება?

- არა, არ მენანება არც საკუთარი თავისთვის და არც სხვებისთვის. თუ მაქვს საშუალება, საჩუქრებით აუცილებლად ვანებივრებ ოჯახის წევრებსა და ახლობლებს.

- წესით, წონის პრობლემა არ უნდა გქონდეს, მაგრამ მაინც გკითხავ, ხომ არ გაწუხებს ზედმეტი კილოგრამები?

- არა, მეტისმეტი სიგამხდრე არ მიხდება და მგონი, ძალიან მსუქანიც არ ვარ, ამიტომ წონის პრობლემა არ მაქვს, ამ ეტაპზე ჩემი წონით კმაყოფილი ვარ. საერთოდ, არანაირ ფიტნესკლუბში არ დავდივარ, ერთადერთი, რასაც ვაკეთებ, ესაა მსუბუქი ვარჯიში დილაობით.

- აქსესუარები გიყვარს?

- კი, განსაკუთრებით მიყვარს საყურე და მძივი, სათვალეც, მაგრამ მათ მაინც იშვიათად ვიკეთებ. ჩანთებს კი ჩაცმულობის მიხედვით ვარჩევ, ხან სპორტული მიჭირავს, ხან - კლასიკური.

- თავს მოდურ ადამიანად მიიჩნევ?

- არა. ვიცვამ იმას, რაც მომწონს და მიხდება. არც კი ვიცი, ახლა რა არის მოდაში, ისეთ რაღაცებს ვირგებ, რაშიც საკუთარი თავი მომწონს. შეიძლება დაემთხვეს და ჩემი სამოსი იმ პერიოდისთვის მოდური იყოს, მაგრამ მარტო იმიტომ არ ჩავიცვამ, რომ რაღაც მოდაშია და აქტუალურია.

- რა გიქმნის დისკომფორტს? რომელია ის ნივთი, რომლის სახლში დარჩენის შემთხვევაში თავს ცუდად იგრძნობ?

- ჯვარი, რომელიც ყოველთვის მიკეთია და ბეჭედი "უფალო შეგვიწყალენ". მათ გარეშე რომ მომიწიოს სახლიდან გასვლამ, ძალიან დიდ დისკომფორტს ვიგრძნობ.

ციცი ომანიძე
ჟურნალი "რეიტინგი"
(გამოდის ორშაბათობით)